التروس عشان تشتغل مع بعض , لازم تكون شبه بعض , سنونهم متناسقة مع بعض . عشان يكونوا في الآخر آلة تدور بانسجام من غير تخبط !
وإلا...
لو مقاسهم مش مناسب لبعض ؛ مع فترة قليلة هتلاقي التروس بدأت تتاكل من كثر الاحتكاك الغلط !!
..
العلاقة بين البشر تقريبا حاجة تشبه دوران التروس ببعضها !!
لما يكون اللي علاقتك بيه شبهك ..
بتلاقي علاقتكم بتمشي في تناغم - وان حصل بعض المشاكل اللي في طبيعة البشر - بس معظم الوقت العلاقة بتدور بانسجام جميل
اما
لو في اختلاف كبير بينكم ؛
هتلاقي سن الترس بتاعك مش راكب كويس على سن الترس بتاعه
ومع مرور الوقت..
هتلاقي نفسك أو هو التروس بتاعتكم بتتآكل - اللي هي من قوتكم وقدراتكم النفسية - وهتضطر من فترة للتانية تغير الترس - تحاول تبقى شبهه أو العكس !!
وفي نهاية الأمر تلاقي سنون تروسك ناحيته تآكلت !!
وإنك هتسيب العلاقة زي ما هي ان حصل احتكاك #بالصدفة بين الترس بتاعك والترس بتاعه - معايدة باهته.. اتصال بارد.. حاجة عازتك ليه او العكس .... الخ - لكن معظم الوقت ترس كل واحد بيدور لوحده !!
وعشان كده..
لما تلاقي الترس بتاعك مش راكب ع الترس بتاع الطرف التاني
أوعى تزعل أو تتضايق - هي ده طبيعة البشر مختلفين - ما تحاولش تغير ترسك وتأثر على طريقة المكينة اللي بتدور التروس بتاعتك عشان تركب ترس مناسب له !
عشان مش عايز تتخلى عنه !!
كل ما في الأمر
دور على حد مناسب ليك
ده أحسن لمكينتك من التلف - صحتك النفسية -
ووفر تروسك للي يشبهك !!
